Populo
congregato, sacerdos cum ministris ad altare accedit, dum cantus ad introitum
peragitur.
Cum ad altare
pervenerit, facta cum ministris profunda inclinatione, osculo altare veneratur
et, pro opportunitate, crucem et altare incensat. Postea cum ministris sedem
petit.
Cantu ad
introitum absoluto, sacerdos et fideles, stantes, signant se signo crucis, dum
sacerdos, ad populum conversus, dicit:
In nomine
Patris, et Filii, et Spiritus Sancti.
Populus respondet:
Amen.
Deinde sacerdos, manus extendens, populum salutat,
dicens:
Gratia
Domini nostri Iesu Christi, et caritas Dei, et communicatio Sancti Spiritus sit
cum omnibus vobis.
Vel:
Gratia
vobis et pax a Deo Patre nostro et Domino Iesu Christo.
Vel:
Dominus
vobiscum.
Populus respondet:
Et cum spiritu tuo.
Episcopus, loco Dominus vobiscum, in hac prima salutatione dicit:
Pax
vobis.
Sacerdos, vel diaconus vel alius minister, potest
brevissimis verbis
introducere fideles in Missam diei.
